José Herrando

Tekst üüb Fering

José Herrando (*1720/1721 uun Valencia, † 1763 uun Madrid) wiar en spaans gichelspeler an komponist uun't barok.

Leewent

José Herrando, 1756. Nationaalbibleteek faan Spanje

Herrando wiar en frinj faan a skriiwer an matemaatiker Diego de Torres Villarroel an en musiker bi hög teaatersköölen uun Madrid. För jo skreew hi hög staken, tu’n bispal för’t komeede „Manos blancas no ofenden“ (witj hunen beleidige een ei) faan Pedro Calderón de la Barca. En sküür loong werket hi för at Hertooch faan Arcos-teaater. För detdiar teaater skreew hi uk „Arte y puntual explicación del modo de tocar el violín con perfección y facilidad“ (konst an ferklaaring, hü ham üüb en gichel perfekt an lacht spelet), wat 1756 uun Pariis drükt wurd. Det wiar at iarst drükt buk faan en spanjer, am tu beskriiwen, hü ham üüb en gichel spelet. Üüb’t föörsidj faan’t buk as en bilj faan Herrando tu sen, wat Carmona maaget hee.

Herrando wiar a iarst gichelspeler faan a „Real Capilla de la Encarnación“, üüs hi uun juar 1754 seeks sonatinas för en gichel mä seeks stringer an generaalbas skreew („Seis sonatinas para violín de cinco cuerdas y bajo armónico, no cifrado“). Dön staken eegnet hi de schongster Carlo Broschi tu, bekäänd oner de nööm Farinelli. Hi wiar en musiker bi de spaans hoof uun a tidj faan Felipe V. Farinelli wiar en kastraat an küd diarauer mä en sopraanstem schong. Sin stem wiar at iansigst, wat a köning bi sin swaar depresiuun holep.

Uun’t juar 1760 dee José Herrando uun London en saamling mä staken faan ham ütj, „Diecisiete nuevos minuetos españoles para dos violines“ (Sööwentaanj nei spaans menueten för tau gichler). So üüs uk en öler komponist uun de tidj, Luis Misón, spelet Herrando de inj auer uun a palast faan a hertööger faan Alba uun Madrid üüb san gichel. Ham witj troch Jose Subirá, wat ens en list maaget hee, wat för staken Herrando skrewen hee: twaalew sonaten för gichel an bas, twaalew toccaten för gichel, twaalew trios för tau gichler an bas, wat uun’t juar 1751 för a hertooch faan Huéscar skrewen wurden san, hög dueten för tau gichler, an en buk mä staken för en fijool („Libro de Diferentes Lecciones para la Viola“ (buk mä onerskiaselk leksen för en fijool). At miast diarfaan as oober uun a spaans borgerkrich (1936-1939) ferbraand, man en paar sonaten haa auerlewet, amdat jo uun a iarst dial faan „Clásicos españoles del violín“ (spaans gichelklasikers), ütjden uun Paris uun’t juar 1937 faan Joaquín Nin, ufdrükt wiar.

Staken

Buken

Arte y puntual explicación del modo de tocar el violín con perfección y facilidad (París, 1756) - (konst an ferklaaring, hü ham üüb en gichel perfekt an lacht spelet)
Libro de Diferentes Lecciones para la Viola - (buk mä onerskiaselk leksen för en fijool)

Musiik staken

Seis sonatinas para violín de cinco cuerdas y bajo armónico, no cifrado - (seeks sonatinas för en gichel mä fiiw stringer an bas)
Doce sonatas para violín y bajo – (twaalew sonaten för gichel an bas)
Doce tocatas para violín – (twaalew gichel toccaten)
Doce tríos para dos violines y bajo – (twaalew trios för tau gichler an bas)
Dúos para dos violines – (dueten för tau gichler)

Referensen

Jasinski, Mark H. "A Translation and Commentary on Jose Herrando's Arte y Puntual Explicacion del Modo de Tocar el Violin (1756)." A thesis presented to the Department of Music, Brigham Young University, in partial fulfillment of the requirements for the degree Master of Arts. August 1974.