Text:Di wunter
 Täkst aw mooringer frasch
|
Di wunter
Di wunter fånget orkel önj
ma snii än is än häägle.
Da büütje lade åål awt lönj,
da schaawe oone säägle.
Än müs än roote kaame in
foon büten önj e rööme,
än üte skjart di nordenwin
än mjardet åle blööme.
Sniiflooke swiirme nü ambai
mör as ouers samerföögle,
än dil foont öisingtåågestrai
deer hunge grut, lung jöögle.
Tacht lait e snii hann ouert fälj,
huum hiirt niinj loosche schunge.
Da föögle fine knååp en mälj,
ik wälj ai ma jam prunge.
Swätj sleept dåt wuntersädj san släip
än driimt am bleesre schamer,
am jörte, löme än am schäip,
am föögle, uurs än samer.
Sü schamert dåt uk heer tu me
wälj gralik nuch as schamel:
Ja, jåchtere wårt et uk for de,
kamst dü jarst önj e hamel.