Text:Siberne
 Täkst aw mooringer frasch
|
Siberne
Trung for arken, duch wälj mååst for tääten
mååged Siberne sin uugne tu.
Dan da wiikne slånge önjt gewääten
leeten ham am nåchtem uk niinj ru.
Häi'r ai sin lüünj jarst sör fertiined
än't lachtsani dan tuninte broocht?
Ångst än faaghäid wirkeden feriined,
as'r ham en grisen ütwäi soocht.
"Wat wal man üülje fider seede,
lätj ik oone giilj me for ham siinj?
Grüne koon ik ham je ai forleede,
dan ik eerme stååkel hääw je niinj!"
Grislik toochte wörden'r nü wiikne
önj jü unglik ångstamsnååret burst.
Niimen koon's wälj foole eere tiikne,
eefter blödj ferlångd san hiitje turst.
Dan di oudere häi tuhuupehülen
aw sin wäljfertiined lüünj.
Ai en schaling häi'r deerfoon spülen,
åles schölj san goue fider füünj.
Än sü gingegn's biise maenouder
nü foon Ääderstää tuhüs döört lönj,
än di läädre hül ham as en brouder
fri ma åles, wat's ferteere schönj.
As's nü Nü Naibel näre kiimen,
looked Siberne ham foon e wäi,
dan hi toocht, deer schucht unk niimen,
deer as nån, deer me ferrädje mäi.
As's deer aw e samerdik nü sätjen
än en ååpel maenouder ätjen,
nüm di fööle Siberne di oudres knif
än broocht schoomlik ham deerma foont lif.
Skjard foon ääderne e stråås ham ouer
- as't me rucht, sü wus e klook jüst fjouer -
nüm sin giilj, ging dan döört Sööderlönj,
ouers nü schülw'r as en boowel for sin schönj.
Siberne wörd hoodid bai e guuli,
maning, deer nuch laawe, hääwe't sänj:
Gung mån bai Klookris haan ouert fuuli,
deer's ham rucht for sin ferbreegen schänj.