Boy Lornsen

Söl'ring

Boy Lornsen (* 7. August 1922 ön Kairem üp Söl; † 26. Juuli 1995 ön Kairem) wiar en dütsk Skulptuurenmaaker en Dechter.

Boy Lornsen, sa üs hi üp di CD fan di Söl'ring Foriining weeget es.

Leewent

Eeđer di taust Wārelkrich heer Lornsen, diar en Fliiger en Funker wesen es, ön di Löns-Konstskuul Hannover fuar dit Fak „Plastik“ studiaret. Hi wiar nü en Stiinhauermaister en Stiinskulptuurenmaakermaister.
Hi wiar da bit hentö di 1960er Jaaren iin ön di Werkstair ön di Wurtleutetweute ön Brunsbütel ön Aarber.
1967 kām sin jerst Jungensbok üt aur en Dreeng, wat fuul Erfinjingen maaget heer.
En ön dit Bok waar en Robot bi sin Skuulaarber holpen.
Me „Robbi, Tobbi und das Fliewatüüt“ es Lornsen gur fan of kemen. Dat Bok wiar 1968 ön di List fuar di „Deutsche Jugendbuchpreis“. Dat Bok es 1972 fan die ARD üs Film foraarbert uuren. Dit waar me holten Popen maaket, en forskeligi Saaken waar me fuul nii Technik omset sa üs di "Blue Screen"-Technik, hurme dit Fliwatüüt me di Popen diarbenen fuar en Film-Lönskep projitsiaret uur kür.
Sent di Tir wiar Lornsen üs en frii Skriiwer tö keen. He maaketi Dechtingen, Jungensboker en Skelterboker en Romaani fuar jungi Liren. He forsjukti, fuar jungi Liren histoorisk Romaanen fan de Tiren üüs fan de Piraat Klaus Störtebeker naier to fo.
Lornsens Werk es ön masi Spraaken aurseet uuren.
Ön dit Jaar 1976 fing hi de Pris fan di "Japanische Schulbibliothekare".
Bitö aarberti he üüs en Autor for Funk en di Fiirlukikest (Sa üs fuar de Sesamstraat).
Sent 1981 wiar Lornsen Meföliger bi P.E.N.

Lornsen wiar me sin Wüf Margot bifriit, en ja haa en Dreeng, Dirk (*1957). Des es Archeoloogi en skriift uk Bokern. 1997 waar Dirk Lornsen me di Friedrich-Hebbel-Pris ütteeknet.

Iaringen

• 1972 Friedrich-Bödecker-Pris for dat Leewentswerk
• 1976 Pris fan di Japanischen Schulbibliothekare
• 1987 Silberne Akademie Hofgeismar

Forskeligi Skuulen sen eeđer höm nēmt uuren:

• Sent 2002 jit di Grünjskuul ön sin Gibuurstērp Kairem Boy-Lornsen-Grünjskuul. Üs des 2008 techtmaaket waar, es di Noom fan di Skuul ön Tinem aurnomen uuren.
• 2004 es di Grünjskuul Nuurđ on Brunsbüttel Boy-Lornsen-Grünjskuul nēmt uuren.
• Di Grünjskuul fan Schaalby ön Sleeswig-Holstiin jit uk Boy-Lornsen-Grünjskuul.

Werken

Boker

Robbi, Tobbi und das Fliewatüüt (1967)
Jakobus Nimmersatt (1968)
Abakus an mini-Max (1970)
Barrnabas und seine Welt (1972)
Feuer im Nacken (1974)
Der Brandstifter von Tarafal (1974)
Dies und das kann Fridolin (1978)
Klaus Störtebeker - Gottes Freund und aller Welt Feind. Mit Bildern von Manfred Schlüter. Thienemann Verlag, Stuttgart 1980
Auf Kaperfahrt mit der Friedlichen Jenny (1982)
Hieronymus Bosch (1983)
Williwitt und Fischermann. Mit Bildern von Manfred Schlüter. (1983)
Williwitt und der große Sturm. Mit Bildern von Manfred Schlüter. (1983)
Williwitt und Vogelmeier. Mit Bildern von Manfred Schlüter. (1984)
Ferien im Storchendorf (1984)
Sinfunikonzert - 13 plattdeutsche Gedichte (1984)
Der Tintenfisch Paul Oktopus. Gedichte für neugierige Kinder (1965) Neuauflage Köln 2009: Boje Verlag. ISBN 978-3-414-82148-5.
Tim Träumer (1985)
Wasser, Wind und Williwitt. Mit Bildern von Manfred Schlüter. (1985)
Nis Puk in der Luk. Mit Bildern von Manfred Schlüter. (1985)
Traugott und Das Wildschwein. Mit Bildern von Manfred Schlüter. (1985)
Der Hase mit dem halben Ohr (1986)
Tante Jeske (1986)
Seenotrettungskreuzer Adolph Bermpohl. Mit Bildern von Manfred Schlüter. (1987)
Jakobus Nimmersatt - Pfoten weg vom Donnerwald. Mit Bildern von Manfred Schlüter. Thienemann Verlag, Stuttgart 1987; Neuauflage mit anderen Bildern: Hase und Igel Verlag, Garching 2005
Nis Puk - Mit der Schule stimmt was nicht. Mit Bildern von Manfred Schlüter. (1988)
Sie wohnen hinter dem Deich (1989)
Schiffe: vom Einbaum zum Ozeanriesen (1989)
Die Möwe und der Gartenzwerg oder.... Mit Bildern von Manfred Schlüter. (1989)
Sien Schöpfung un wat achterno keem (1991) (als Hörbuch [Audio-CD] 2002 im Quickborn-Verlag)
Nis Puk und die Wintermacher. Mit Bildern von Manfred Schlüter. (1993)
Das Wrack vor der Küste (1993)
Jesus von Nazareth. Een Stremel Weltgeschicht (1994) Mit Bildern von Manfred Schlüter.

Forfilmingen

Robbi, Tobbi und das Fliewatüüt. Popenspöl-Fernsehserie me 11 Diilen fan 25 Min.
Draibok en Regii: Armin Maiwald. Produktsjoon: WDR, 1972.
Ali Diili sen üs DVD tö fo.

Robbi, Tobbi und das Fliewatüüt.
Kinofilm me en nii Interpretatsjoon aur dit Theema, 2016. Regii: Wolfgang Groos
Me Spölsters sa üs Arsseni Bultmann, Alexandra Maria Lara, Sam Riley, Friedrich Mücke, Jördis Triebel, Bjarne Mädel en Ralph Caspers.

1982 waar en "Tatort" me di Noom "Wat Recht is mutt Recht blieben" weeget. Diarfuar es dit Forteling "Master next God" fuar di Film omskrewen uuren.

CD

Di CD tö Lornsens füfentachentigst Gibuursdai.

Ön't Jaar 2007 waar tö Lornsens 85st Gibuursdai en CD me Staatjis fan höm töhopstelt.
Diar sen Āpnaamen fan Boy Lornsen ön tö hiir, en üđer Staatjis heer Stefan Hartmann fan Kairem leest.
Martin Stephan (Klawiir) en Thomas Vester (Saxofoon) haa Musik diarfuar komponiaret en āpnomen.

Trivia

Dat „Kraken-Orakel“ Paul, wat fan 2008 bit hentö 2010 me gurt Stohai di Ütkumsten fan EM- en WM-Spöle fan di dütsk Natsionaalmanskep rocht fuarütsair heer, fing sin Noom eeđer Boy Lornsens Dechting "Der Tintenfisch Paul Oktopus".

Luki uk diar

• Literatuur fan en aur Boy Lornsen ön di kataloog fan di Dütsk Natjunaalbibleteek