MaK DE 1024

Söl'ring

Fan di Diesellokomotiiwi MaK DE 1024 of DB-BR 240 waar ön't Jaar 1989 ön Töhopaarber fan MaK, Krupp en ABB trii Stek becht. 2018 wiar diarfan bluat jit Numer trii aur, wat üs "DE 13" bi di Rheincargo löp. Uk des es mermung wechkemen.

DB-Baureihe 240
DB 240 003-4 "Lübeck" ön di Baanhof Naibel DB 240 003-4 "Lübeck" ön di Baanhof Naibel
Numer:	DB 240 001–003
Becht fan des Aart:	2 x 3
Fabrik:	MaK, Krupp en ABB
Bechningsjaar(en):	1989
Ütmustert:	001:2008 002: 2005, 2009 ombecht 003: 2016
Aksformel:	Co'Co'
Spöörbreetji:	1435 mm (Normaalspöör)
Leengdi aur Puffer:	20.960 mm
Hoogdi:	4175 mm
Breedji:	2910 mm
Draiknasten sen ütenachtler:	11.680 mm
Draistaalen sen ütenachtler:	3890 mm
Gesamtradstand:	15.650 mm
Litjest Hualevmeeter:	100 m
Tiinstwecht:	117,0 t
Töleten Gauhair:	160 km/h
Iinbecht Maskiinenkraft:	2.650 kW
Öntochkraft:	405 kN
Driifweelen-Döörmeeter:	1016 / 936 mm
Maskiinentyp:	12M282
Meskiin drait me:	1000/min
Brenstoftank:	Diesel: 5.000 l sa üs uk Mootorööl: 1.100 l Köölweeter: 1.200 l Sön: 480 kg

Wat diarfuar wiar

Di DB her ön di 1980er Jaaren dit Program, hureeđer 400 Stek fan di BR 218 koopet waar, ofslööten. Em wil nü fuaral Lokomotiiwen me jen Maskiin (Di V 200 her tau Maskiinen her) sa üs fjuur Aksen koopi. Di Öndreft skul dieselhydraulisk laap.
Krauss Maffei her en Prototyp, di V 300 me soks Aksen fan di V 200 becht, en fan di DB kām di V 320 diartö. Biiring her Kraft inoch, man ja waar ek üs Seerie becht en koopet. Di V 300 ging man al 1980 üp Skramel en wiar 1975 ütmustert uuren.
Di DB her da fuar, me tau swak Loks tö köör (Debeltraktsjoon), wan muar Kraft nöörig wiar.

Henschel-BBC DE 2500

Di Industrii her üt höör ain Kas trii moderni Prototypen becht, sa waar al 1973 di Henschel-BBC DE 2500 fuarstelt. Di DE 2500 kür me fjuur of soks Aksen becht uur, her en aur di Maaten moderni Hüüsing en - dit wiar dit sentraali Niis, em kür dieselelektrisk me Draistroommotooren köör. Des maaki ek fuul Aarber wan ja iinbecht sen, haa fuul Kraft, man ja sen uk swaar öntöstjüüri.

• 
  Di Henschel-BBC DE 2500 waar fan di DB üs BR 202 föört.
• 
  Ark fan di trii Loks her en üđer Klöör. Di Trēr wiar ruar.

Diar es di Baan uk aartig me köört, man koopi wil jü di DE 2500 dach ek. Sa waar di Loks tö en Diil tö Privaatbaanen ön Euroopa forhüürt; jen waar üs Elektrolok ombecht en ging naa di Neđerlönen. Ön jen Lok (Di blö Numer trii) waar fiiđer forsket, en dit raaket di Draistroom-Öndreft sa üs uk di Draistaalen. Hat ging fuaral diarom, hur'ling em Ruu iin ön di Maskiin fair, wan em diar 250 km/h me köört. Wat diarbi ütkām, dit kür da fuar di Elektrolok BR 120 en uk fuar di Intercity-Express (Fuarof Intercity Experimental) gur nütet uur.
Des Lok stuunt deling iin ön dit Dütsk Technikmuseeum ön Berliin.

Bechning fan di DE 1024

Di Taacht me dieselelektrisk Öndreft wiar man ek hiilendal stürewen, en sa forsaacht MaK dit ön di 1980er Jaaren jit jens. Di Mootorstjüüring wil ABB hol forkoopi, en sa waar uk jir töhopaarbert.
Trii Lokomotiiwen waar becht, en tö des Tir jert di "Litj Skepsdiesel" 12M282 fan MaK tö dit Efitsientest wat em fo kür
. Aurdat di man bal 150 Liitern Brenrüm her, maast di me Preslucht önleten uur.

Di DB hüürt di trii Loks da fuaral fuar gaui Tochen twesken Kiil en Hamborig sa üs fuar di ICs ön di Mērskbaan.
Di Loks fing uk Noomen: Numer jen waar di Kiel, Numer tau waar di Westerland en Numer trii waar di Lübeck. Eeđer en Tir me "Ungstlok" (Diar wiar en BR 218 me ön di Toch) löp dit bit 1996 gur, man di Baan kür höör ek öntskiar en koopi di Maskiinen.
Eeđer dit Töhopföörin fan Uast- en Weestdütsklön her em me di BR 232 ("Ludmilla") en dieselelektrisk Lok, en em meenti, dat des dit efen sa gur kür.
Di Konstruktsjoon waar tö en gurt Diil fuar di NSB Di 6 of Mak DE 2700 iinseet. Öntwesken her Lok Numer trii uk ön Nuurweegen tö Proof wesen, en di Nuurweegern wil di Maskiin noch haa.

Di trii DE 1024 waar naa Köln forkoopet en üs DE 11, 12 en 13 fuar Frachtentochen bi di Haawenbaan iinseet.

• 
  MaK DE 1024 üs DE 11 fan di HGK ön Emmerich (16.12.2007)

Hur di Loks blewen sen

MaK DE 1024 üs DE 11 (Haawen- en Frachtenbaan Köln) ütbronen ön Brühl, Januwaari 2010

1996/97 kām jest Numer tau en trii, leeterhen uk Numer jen naa Köln tö di Haawen- en Frachtenbaan (HGK), Diar löp ja aur 10 Jaaren rocht gur, man da bruan jest DE 12 en leeter uk DE 11 üp jen Jen üt. DE 11 waar ön di 13.4.2008 üt Tiinst nomen, DE 12 (Üt Tiinst sent 2005) waar 2009 naa Kiil forkoopet, aurdat Voith en EU-Projekt her. Des jeet CREAM (Customer-driven Rail-freight), en diarfuar skul DE 12 üs Hybrid- of Taukraft-Lok ombecht uur, wat me 1.250 kW Dieselelektrisk of me 4.400 kW ön Köörwiir laap ken. Des heer ek slaaget, aurdat em niin rocht Trafo diarfuar fo kür. Di Lok waar da likert üs "Voith Futura" fuarstelt. "Cream" skul di Frachtenforkiir twesken Nuurđsee en Bosporus weđer ön Gang help. Öntwesken stuunt di Maskiin al soks Jaaren bi di Nuurđerhaawen ön Kiil-Wik ombi en forröötet lungsem man seeker.
DE 13 es 2016 ütmustert uuren, man bi Loks ken dit altert wiis, dat di weđer ön Gang braacht uur. DE 13 wiar man ek önsteken, bluat di Tir fuar di Proof oflöpen.

Trinjom 2020 sen biiring Maskiinen önsteken slain uuren.

Diareeđer kām da...

Fan di MaK DE 1024 kām di NSB Di 6. Des heer man ek sa rocht slaaget, aurdat dit Adaptiarin fan di Siemens-Stjüüring aur di Maaten fuul Swaarhairen maaket her. Des Loks sen man nü al leenger ön Gang en üp Streek üs tau fan trii DE 1024 jens wesen sen. Muar skul fan dit Konsept uk ek kum aurdat Vossloh öntwesken di Euro 4000 önbēr, wat ön Spānien becht uur.

Luki uk jir

 Commons: DB-Baureihe 240 – Saamlang faan bilen of filmer

• Daaten en muar aur di DE 1024 (Loks aus Kiel)

• Hybridlok ehemals MaK DE 1024 in neuer Lackierung und Bügel hoch Wat aur 240 002