Siie (ääm wååder)

Täkst aw mooringer frasch

Jü siie (uk: sii unti säi) as dåt tuhuupehingen wååder wat e kontinänte amjeeft. Deer tu hiire biise da Ooseane än uk da latjere, deer ma ferbünene siie suk as e Weestsiie än et Madelheef. Uk am änkelte diile foon e Ooseane wårt siie säid wan et deer en was geogrååfisch begränsing jeeft, t.b. döör ailönje. Aptu wårt dåt uurd siie uk for en grut wååder brükt wat fåli foon lönj amjääwen as, lök heer: Siie (banerwååder).

E siie bedaket ambai 71% foon e jard än mååst en treedepårt as 4000-5000 m diip. Dåt diipst stää läit önj e Mariaanenslüütj önj e Pasiifik ma en 11.000 m. Flåkere regjoone jeeft et for ålem aw e kontinentoolschälwe, t.b. önj e Weestsiie.

Et siiwååder as sålti. Dåt önjdiilj foon sålt as ambai 3,5% önj åle ooseane, et koon ham ouers önj maning stäänge anere. Önj e diipde as et wååder oofting såltier, än aw e näide foon struumemüsinge, weer fjarsch wååder in önj e siie låpt, as er maner sålt.