Volkswagen AG

Söl'ring

Di Volkswagen Aktienselskep (kuurt VW AG) ön Wolfsburg/Liigersaksen es en dütsk Autofirma. Jü jert fuaral di Famiilien Porsche en Piëch fan Uasterrik.

Volkswagen Aktiengesellschaft
Logo
Rochtsforem	Aktienselskep
Grünjliar	28. Mai 1937 ön Berlin
Hüüsing	Wolfsburg, Dütsklön' Dütsklön'
Fööringskontoor	Herbert Diess Fuarseeter fan di Fuarstant Oliver Blume (Manager) Markus Duesmann Gunnar Kilian Andreas Renschler Stefan Sommer Hiltrud Dorothea Werner Frank Witter Hans Dieter Pötsch (Fuarseeter fan di Selskepsreer)
Aarberers	671.200 (2019)
Jil / Jaar	252,6 Mrd. Euro (2019)
Branche	Autofirma, Finans- en Logistiktiinsten
Weebsir	www.volkswagenag.com
Stand: 31. Detsember 2019

Dat et di Firma jeft kumt fuaral diarfan, dat Adolf Hitler en sin NS en Auto fuar't Folk, di Folkswain haa wil, wat Ferdinand Porsche konstruiari skul en uk konstruiaret heer.

Elektrowainer

Al ön di soowetiger en tachentiger Jaaren waar altert weđer Autos me Elektromaskiinen en Luar-Bateriien ombecht. Fan di VW Golf II en III jaav dit "City-Stromer", wat me Luarbateriien ombi 60 bit 80km laap kür. Di Technik wiar al sa gur, dat fuaral fan di Golf III, en Wain fan di jer niigentiger Jaaren, uk Ombechningen me Lithium-Bateriien önerwai sen, wat üp Laapwaien fan ombi 150 km kum.

Fan di Golf en di Passat waar uk Hybrid-Wainer ("GTE") becht, wat me jaar Lithium-Baterii ombi 60 km laap ken en uk en Bensiinmaskiin me langs haa.

Gurter Seerien waar man ek jerer üs fan di E-Up en di E-Golf becht. Sent 2019 jeft et en MEB (Modulaari Elektro-Bechningskast), hurfan nii Modeli becht uur. Di Jest es di ID.3; des Auto es ombi sa gurt üs en Golf.

Me Luarbateriien

Di jest elektrisk Seerienwain fan VW wiar di T2b Typ 2150 „Elektrotransporter“, en VW-Bus, üs sa sair uur. Des löp me Luar-Süüri-Bateriien, jen Leering leengti fuar 50 bit 80 km. Dit Wecht fan di Bateriien fan 850 kg braacht di lerig Wain üp 2,2 Tenen. Di Wain kür 75 km/h laap, en becht waar diarfan twesken 120 en 200 Stek.
Di Maskiinenkraft wiar jest 16 kw en fuar kuurt Tir 32 kW, hurfan leeterhen 17/33 kW waar.
Di Bateriien kür omseet uur, wan di lerig wiar. Diarfuar her di Wain en Bateriisküüvkast, hur em me en Gaafelhüüver iinleengi kür.

1976 waar di jest CitySTROMer fan di Golf I becht, wat em ek koopi kür. Des wiar fuaral fuar Energiifirmen sa üs RWE önerwai. Peter Lustig her sa'n Wain jens fuar en Ütgaav fan sin Fiirluki-Reeg "Löwenzahn" ön Gang.

Twesken 1992 en 1996 waar fan Golf II en Golf III jit jens Elektrowainer - me Luar-Geel-Bateriien - becht; dit skel man bluat 120 Stek uuren wiis. Des Wainer uur deling jit üp nii Bateriien ombecht.
Des Wainer her en 96 Volt-Systeem me 160 Ah, wat ombi 15 kWh Kapatsiteet sen. Di Wain kür diarme ombi 40 bit 80 km laap. Di Maskiinenkraft wiar 17,5 kW (23,8 PS), fuar kuurt Tir uk 20 kW. Jü wiar iinfach ön di Skrekelkast skrüüvt, wat ark Golf her, en diarme kür di Wain 100 km/h laap. Di CitySTROMer her al Rekuperatsjoon, dat di kineetisk Energii bi't Bremsin Stroom fuar di Baterii maaket.

Di CitySTROMer noom uk muar Stroom üs delings Wainer. Wan en E-Golf fan 2019 me 13 kWh lapt, da skul di CitySTROMer 17 kWh haa. Swaarhairen jaav dit me dit Leergiraat, hur fan di Stroom, wat iinging bluat ombi 80% ütkām. Wan em teenkt, dat des 17 kWh 80% fan di Energii sen wat iinkemen es, da sen 100% 17/8*10=21,25kWh bluat fuar tö köör. Ön di Wunter kür des Auto üp 25 bit 27 kWh fuar 100 km kum, da kür dit me di Bateriien jit 40 km laap.

Likert wiar 49% Omseeting fan di Energii tö des Tir aur di Maaten gur. Di beest Dieselmaskiinen wiar bi 22%, en bi Seerien-Autos üp Straat es em uk bit 2020 ek aur 25% kemen. Bi Bensiin es't jit mener.

• 
  Di jest Elektrobus, wat oler lööwert waar stön iin ön't Technikmuseeum ön Stade.
• 
  Bi des Elektrobus fan 1979 sjocht em di Luchtspleeten fuar di Bateriien iin ön di Sküüvdüür.
• 
  En VW-Bus en en Golf 1 Elektro staan iin ön di Gleesen Manufaktuur ön Dresden.
• 
  En CitySTROMer fan di Golf III

Alternatiiwen tö Bensiin

Ön di soowentiger Jaaren heer VW uk me Ethanool aarbert, aurdat des ön Brasiilien fuul fuar Autos nomen waar. Dir kür höm ek döörseet, aurdat Ethanool bluat 65% fan di Brenkraft heer wat Bensiin heer.

Diarbi es man dach ütkemen, dat iin ön delings Bensiin 5% Ethanool sen, bi E10 sen dit 10%.

Tö didiarem Tir: 1975 wiar jit Luar iin ön't Bensiin (Jit bit 1991 tö fo). Katalysatooren sa üs Bensiin söner Luar jaav't bluat ön hok Lönen sa üs Kalifornien en Kanada.

Marken

Tö di Volkswagen AG hiir masi Automarken sa üs:

• Volkswagen
• Škoda
• Seat
• Bentley