ASAG

Tekst üüb Öömrang

A ASAG wiar en reederei an ferboonj Oomram, A Huug an A Nääs mä Schlüttsiel.

Det flag faan a ASAG

Üs 1971 a ASAG mä a W.D.R. tuupsmääd, kaam det nuurdfresk flag iinuun't W.D.R.-flag

Histoore

Al tu began faan't 20. juarhunert hää det famile Jakobs faan A Nääs a Halgen fersuragt. Di liinjinsiinst begand 1905 mä en siilskap, 1927 kaam det iarst motoorbuat. Hat küd 40 lidj mänem an wurd efter det werew üüb A Nääs Hilligenlei näämd. Di siinst lep faan Bongsiel auer A Huug an A Nääs tu Oomram. 1951 kaam en neibau, di uk weder Hilligenlei het.

Uun a juaren 1958 bit 1960 as di Hauke-Haien-Kuuch iindiket wurden an Bongsiel lai nü banluns. Di nei siahuuwen wiar nü Schlüttsiel. 1960 hää August Jakobs det Amrumer Schiffahrts-Aktiengesellschaft (ASAG) uun Stianood grünjlaanj. Uun't salew juar kaam en modernen damper uun siinst, a Amrum. Man al 1968 kaam diar en nei an föl grater skap, hat het uk weder Amrum. At nei Amrum wiar goorei tu fegliken mä det ual, hat hed 212 BRT an wiar gud 32 m lung, 10 m briad an ging 1,50 m jip. Diar paaset 481 pasajiiren an 20 Pkw üüb. 1991 wurd a Amrum ferkääft an keert daalang noch üs Vitte üüb a Uastsia tu Hiddensee.

1971 hää a ASAG mä det föl grater W.D.R. tuupsmeden, an sodenang besiinet a W.D.R. nü uk a Halgen. Sant 1991 keerd diar weder en Hilligenlei, det wiar nü numer 3. Hat as 1991 baud wurden, küd 27 Pkw an 630 pasajiiren mänem. 2005 as a Hilligenlei III tu't reederei AG Ems ferkääft wurden an het nü Groningerland. Daalang keert a Hilligenlei I tu a Halgen.

ASAG-Dampern an efterfulgern üüb't halaglinje

• 
  Hilligenlei 1 (1927)
• 
  Hilligenlei 2 (1951)
• 
  Det iarst 'Amrum' (1960), daalang 'Hauke Haien'.
• 
  Det naist 'Amrum' (1968), daalang 'Vitte'.
• 
  'Hilligenlei III' (1991), daalang 'Groningerland'
• 
  'Hilligenlei I' (1985)
  ( eegentelk numer 4 )

Heest dü ferlicht noch smok bilen?

Luke uk diar

• www.halligfreunde.de
• W.D.R.
• August Jakobs woort 90 (amrum-news.de, 2010)
• Amrum II üüb fleetfilerotterdam.nl