Fering dracht

Tekst üüb Fering

At fering. At öömring hee man aacht knooper oner a panserkeed uunsteed faan tjiin üüb Feer.

Histoore

At fering dracht (of uk man ianfach at fering), wat ham daaling faan Feer an Oomrem käänt, jaft at noch goor ei so loong. Iarst tu a began faan't 19. juarhunert kaam at uun a muud an hed wel det dracht faan a Halgen üüs föörbilj. Nütudais drait ham fööraal det fering, wat ham iar tu huuchhaiden uunhed. Det uuntjin as oober goor ei so lacht an ham brükt diar halep för.

Beskriiwing

Det suart, fjauerhuket braanjnöösduk wurt so konstfol trinj am't hood bünjen, det auer a braanj de raam, huar en ruusenmönster üübseid as, tu sen komt. Bi a sidjen faan't braanjnöösduk hinge franjin deel. Bi befreid wüfen wurd beeft üüb't hiar noch en letj ruad duk mä suart parler üüb feeststeecht.
De jonk pei lingt miast deel tu a fet an hee onern en laachtblä snuur. Trinjam a skolern wurt det triihuket halsnöösduk uun fualen laanjen an mä en 100 needler üüb a pei plakt. Det siisen halsnöösduk jaft at uun muar klöören. At kön tu'n bispal ruad, green of blä wees an hee trinjenam en kant mä suart franjin. Bi dön suart sliawen san witj spitsen biseid. Tu huuchhaiden namt ham fölsis en witjen skortluk föör, wat miast trinjenam lingt. At jaft oober skortluker uun suart an brons.

At salwer

At wäärtfolst bi't fering as at salwer. Diartu hiart a panser, en briad salwern keed, wat mä tau haagen bi a pei feestmaaget wurt. At hee en medaljon uun a maden, wat en krüs, en hart an en aanker wiset, dön teeken för gluuw, leefde an hööb. Bi det briad keed san uk noch smeel keeden ütj gul an salwer feestmaaget. Det hiale wurt faan tjiin bit twaalew salwern knooper iinraamet. Tu't salwer hiar uk noch knooper för a sliawen an knoopneedler för a braanjnöösduk.

Luke uk diar

• Sölring Drachten
• Dr. Carl Häberlin: Die nordfriesischen Volkstrachten, 1909, sidjen VI bit XIII

Ferwising efter bütjen

• Hooger Tracht (üüb tsjiisk)