Toyota

Söl'ring

Di Toyota Motor Corporation (Japaansk: Toyota Jidōsha Kabushiki-gaisha) es en multinatsjonaali Autofabrik fan Japan. Ön't Jaar 2015 waar 7,49 Miljoonen Autos forkoopet, en diarme wiar Toyota di gutest Autofabrik üp Öört. 2013 wiar dit jit 9,98 Miljoonen (achterön kām VW me 9,73 en General Motors me 9,71 Miljoonen), waar dit leeterhen en bet mener.

Toyota Motor Corporation
Logo
Rochtsforem	Kabushiki-gaisha (Aktienselskep)
ISIN	JP3633400001
Grünjliar	28. August 1937
Hüüsing	Toyota, Japan Jāpan
Fööringskontoor	Akio Toyoda (President) T. Uchiyamada (Föörstant)
Aarberers	369.124 (2018)
Jil / Jaar	29 Bio. ¥ (183 Mrd. €) (2018)
Branche	Autobechning
Weebsir	www.toyota-global.com

• 
  Haupthüs fan di Toyota Motor Corporation in Toyota ön Jāpan
• 
  Toyota-Pavillon ön Tahara bi di Expo 2005
• 
  Bronzestātue fan Kiichirō Toyoda

Di Autofabrik Toyota waar 1937 iipenmaaket, en sent 1970 forkoopet di Firma uk ön Dütsklön. Fan Toyota kum Autos sa üs di Plug-In-Hybrid Prius of dit Weeterstofauto Mirai.

Histoorie

Toyota Model AA, dit jest Toyota-Automodel fan 1936

Ön't Jaar 1867 kām Sakichi Toyoda üp Lön trinjom Nagoya ön Jāpan tö Wārel. Sin Faađer wiar di Tömrer Ikichi Toyoda, en fan des liirt hi dit Bruarwening fan di Tömrer. Me dit Weeten diarfan taacht hi en Spenmaskiin üt, fan 1894 ön waar uk Weewelstöölern becht. Leeterhen dref hi des me en Dampmaskiin ön.

Öntweslken her Sakichi uk en Dreeng, Kiichirō Toyoda, diar ön Tokio Maskiinenbechning studiaret her. Biiring kür töhop en automaatisk Weewelmaskiin ütbring. Nii wiar dit Prinsip Jidōka, di automoomi Automatisiaring, wat leeterhen uk Prinsip fuar di Autofabrik waar. Di Maskiin ging üt, wan di Tiarling reef, diar tört ek fuar ark Maskiin önstel uur, wat üppaset. Fuar di Produktsjoon en dit Forkoopin waar di Firma Toyoda Automatic Loom Inc. iipenmaaket.

1929 fing Sakichi Toyoda me, dat di Mensken hol Autos haa wil, en diarom stjüürt hi sin Dreeng naa Englön, di Patenti fuar di Weewelsmaskiinen tö forkoopi. Fan dit Jil skul da en Autoproduktsjoon bigent uur.
Kiichirō Toyoda fing 100.000 brit. Pund fuar di Patenti, en diarfan kür ja en Auto ütteenk. 1935 kām dit jest Model, di Toyota A1 üt. Des waar man auraarbert en tö dit Model AA'' maaket, wat 1936 ütkām.

1937 maaketi Kiichirō Toyoda me sin Vetter Eiji Toyoda di Toyota Motor Corporation iipen, hur di Autofabrik me tökām. Di Noom waar anert, dat di Firma en hi fuar sin Priwaatleewent forskeligi Noomen her. Üp Japaansk es di Noom Toyota uk iinfacher tö skriif.

• 
  Skriiwing fan Toyoda (japaansk)
• 
  Skriiwing fan Toyota (japaansk)
• 
  Di Skriiwing fan „Toyota“ giar me aacht Streeken

Uk en LKW waar önböören, en des waar twesken 1937 en 1945 fuar di Krich iinset.

Eeđer di Krich ging di Fabrikatsjoon 1947 me dit Model Toyopet SA fiiđer.

Luki uk jir

 Commons: Toyota – Saamling fan Skelter en Videos