Uwe Jens Lornsen

Uwe Jens Lornsen (* 18. Nofember 1793 uun Kairem üüb Sal; † 13. Febrewoore 1838 uun Collonge-Bellerive uun a Sweits) wiar en rochtsgeliarten an beamten faan't däänsk krüün. Mä sin letj buk Ueber das Verfassungswerk in Schleswigholstein hää hi ham för en ianag Schleswig-Holstian iinsaat.

Leewent

Lornsen-stunbil uun Rendsborag.

Uwe Jens Lornsen wurd bäären üs dring faan en koptein. Hi wul salew uk hal koptein wurd, man uun Euroopa wiar kriich. So studiaret hi rochtswedenskapen uun Kiil an Jena. 10 juar loong werket hi üs beamten uun Kopenhuuwen an wiar diar tustendag för a hertoochdoomen Schleswig, Holstian an Lauenburg.

1830 as Lornsen loonfööges üüb Sal wurden. Sin letj buk ütj at salew juar hed man 14 sidjen, man auer hi diarmä det monarchii uungrääb, kaam'er för en juar uun't suart hool faan Kiil an Rendsborag. Diar seed hi faan 1831 bit 1832. 1833 neid'er ütj an lewet hög juaren uun Rio de Janeiro. Diar skrääw hi det buk Die Unions-Verfassung Dänemarks und Schleswig-Holsteins, wat oober iarst efter san duas faan Wilhelm Beseler ütjden wurden as. 1837 kaam'er tüs tu Euroopa, auer sin saster swaar kraank wiar. Uun a Sweits füng hi tu weden, dat hat oober al stürwen wiar. Hi wiar so swaarmudag, dat hi ham 1838 salew duad skood.

Iarangen

Uun Rendsborag as 1878 en stunbil apsteld wurden.
Uun't Salrang Museeum uun Kairem as en ütjstelang auer sin leewent.
Struaten dreeg san nööm uun Waasterlun, Bad Segeberg, Bräist, Eckernförde, Elmshorn, Flensborag, Heide, Hüsem, Kellinghusen, Kiil, Neumünster, Naibel, Quickborn, Rendsborag, Schenefeld, Süderbrarup an Hamborag-Altona.
Uun Schleswig jaft at en Lornsenskuul
Det Uwe-Dün uun Kaamp as efter ham näämd wurden.
At WSA uun Tönang hää sant 1937 trii skeb efter ham näämd.

Luke uk diar

Commonskategorii: Uwe Jens Lornsen – Saamlang faan bilen of filmer

Literatüür faan of auer Uwe Jens Lornsen uun a kataloog faan't Sjiisk Natsionaalbibleteek
Gesellschaft für schleswig-holsteinische Geschichte auer sin leewent an werk
WSA auer skeb mä Lornsen san nööm
Uwe Jens Lornsen uun't Sjiisk Biografii